გავრცელებული ინფორმაციით, ლა ლიგის მომდევნი ტურში, "ელ კლასიკოში" როდრიგო "რეალს" ვერ დაეხმარება. მიზეზი ბრაზილიელის "დორტმუნდთან" მიღებული დაზიანებაა. 

ჩემპიონთა ლიგის გუშინდელ ტურში, სადაც "თეთრებმა" "დორტმუნდი" 5-2 დაამარცხეს, როდრიგომ მოედანი 85-ე წუთზე დატოვა. მატჩის დროს ბრაზილიელს სერიოზული დაზიანება არ აღენიშნებოდა, თუმცა, როგორც ირკვევა, ტკივილმა ის თამაშის შემდეგ შეაწუხა. 

Diario AS იუწყება, რომ როდრიგოს სამედიცინო ტესტირებას დღეს, მადრიდში ჩაიტარებს, 3 დღეში კი, კლუბი "სანტიაგო ბერნაბეუზე" "ბარსელონას" მიიღებს. წინასწარი ინფორმაციით, ბრაზილიელი რამდენიმე მატჩს გამოტოვებს, თუმცა, ზუსტ პასუხს იმის თაობაზე, იქნება თუ არა ბრაზილიელი ლა ლიგის პირველადგილოსნების წინააღმდეგ მატჩში, უახლოეს საათებში გავიგებთ.