საფრანგეთის ნაკრებმა ევრო 2024 ავსტრიის დამარცხებით დაიწყო, მაგრამ გუშინდელი მატჩი "მამლებმა" მაინც დადარდიანებულებმა ჩაამთავრეს, რისი მიზეზიც მათი მთავარი ვარსკვლავის, კილიან მბაპეს მდგომარეობაა.
აწ უკვე მადრიდის "რეალის" თავდამსხმელს კევინ დანსოსთან შეჯახებით ცხვირი გაუტყდა. კილიანი მოედნიდან მალევე გაიყვანეს, თუმცა იქამდე ყვითელი ბარათის მიღებაც მოასწრო. მბაპეს შესახებ ფრანგების ბანაკიდან ოფიციალური განცხადებაც გაკეთდა:
"კილიან მბაპემ ორშაბათს დიუსელდორფში ავსტრიასთან გამართული მატჩის მეორე ნახევარში ცხვირი გაიტეხა. საფრანგეთის ნაკრების კაპიტანს ჯერ სამედიცინო შტაბმა და ექიმმა ფრანკ ლე გალმა გაუწია დახმარება. მანვე დასვა ცხვირის გატეხვის დიაგნოზი, რომელიც დიუსელდორფის საავადმყოფოში ჩატარებულმა რადიოლოგიურმა გამოკვლევებმაც დაადასტურეს.
კილიან მბაპე საფრანგეთის ნაკრების ბაზაზე დაბრუნდა. მომდევნო დღეებში მას უმკურნალებენ, თუმცა ქირურგიული ჩარევის გარეშე. მკურნალობისთვის საჭირო პერიოდის გასვლის შემდეგ, საფრანგეთის ნაკრების ათიანი მინდორზე ნიღბით დაბრუნდება."
ფრანგულ პრესაში გავრცელებული ცნობების თანახმად, ითამაშებს თუ არა კილიანი პარასკევს, ნიდერლანდების ნაკრების წინააღმდეგ, მატჩამდე ცოტა ხნით ადრე გადაწყდება.
აქვე გეტყვით, რომ გუშინ სამფეროვნებმა მინიმალური სხვაობით (1:0) მოიგეს. ერთადერთი გოლი 38-ე წუთზე გავიდა - მაქსიმილიან ვობერმა ბურთი საკუთარ კარში გადაგზავნა. სხვათა შორის, ეს ავტოგოლი სწორედ მბაპეს აქტიურობას მოჰყვა. დიდიე დეშამის შეგირდები C ჯგუფში ლიდერობას სწორედ ნიდერლანდელებთან იყოფენ. ამ გუნდების მატჩი 21 ივნისს, თბილისის დროით 23 საათზე დაიწყება.
